कार्यगौरव आणि कृतज्ञतास्मरण

हीरक महोत्सवी कार्यगौरव आणि कृतज्ञतास्मरण

          आम्ही, मुटाट पंचक्रोशी शिक्षण प्रसारक मंडळाच्या कार्यकारी समितीचे पदाधिकारी आणि सदस्य, सर्व सभासदांच्यावतीने आमच्या सर्व पुर्वसुरींच्या कर्तृत्वाचा, गुणांचा, कार्य समरसतेचा आणि बहुआयामी व्यक्तिमत्वाचा आदर करून त्यांच्या मंडळ कार्यातील भरीव योगदानाचा या सन्मानपत्राने कृतज्ञतापूर्वक कार्यगौरव करीत आहोत.

          मुटाट पंचक्रोशी शिक्षण प्रसारक मंडळाच्या शैक्षणिक प्रगतीच्या दमदार वाटचालीत आपण अत्यंत तळमळीने काम करीत असताना व्रतस्थपणे आपल्या कार्याचा ठसा उमटवला आहे. मुटाट पंचक्रोशी शिक्षण प्रसारक मंडळाच्या  स्थापनेत, शैक्षणिक प्रगतीत,आपल्या कार्यकाळात आणि कार्यनिवृत्तीनंतरही भरीव योगदान देत आणि संपर्काद्वारे हायस्कूल आणि कनिष्ठ महाविद्यालयातील विद्यार्थ्यांच्या सर्वांगीण विकासाचा आपण ध्यास घेतला होता/आहे.

        डॉ. श्रीधर रघुनाथ लेले हायस्कूल मुटाट, कै.भाऊसाहेब काळे भागशाळा मणचे आणि कै.सौ. जानकी शिवराम राणे कला व वाणिज्य (सं) कनिष्ठ महाविद्दयालयाच्या आणि विद्यार्थ्यांच्या उत्कर्षासाठी आपल्या जनसंपर्कातून अनेक सुविधा मिळविणे आणि नाविण्यपूर्ण उपक्रम राबविण्याचा आपला प्रयत्न लक्षवेधी आहे. आपली अविरत काम करण्याची जिद्द, आम्हां सर्वांना  प्रेरणा आणि प्रोत्साहन देणारी आहे. आपला विधायक दृष्टीकोन, कर्तृत्व, चिकित्सक वृत्ती, कार्यतत्परता आणि सामाजिक बांधिलकीची जाण अनुकरणीय आणि प्रेरणादायी आहे. आज हीरक महोत्सव सांगता समारोह प्रसंगी हे कार्यगौरव सन्मानपत्र आपणांस आदरपूर्वक अर्पण करताना कृतकृत्य वाटत आहे.